Общественно-политическая интернет-газета

Саха сиригэр буолбут уларыйыылар тула Владимир Поскачин тус санаата бүгүн, аныгы сибээс ситимнэригэр күүскэ тарҕанан, араас улуустарга дьон-сэргэ киэҥ биhирэбилин түмтэ:

- Егор Афанасьевич кэмигэр улуус баһылыгын быһыытынан үлэлээбит буоламмын, кинини салайааччы быһыытынан син билэбин диэхпин сөп. Хайдах бөһүөлэк баһылыгынан талыллыахпыттан, ол аата 2005 сыллаахтан, кини бастаан бырабыыталыстыба бэрэссэдээтэлэ онтон Президент, онтон Ил Дархан быһыытынан өрөспүүбүлүкэни салайарын, кини салалтатын быһаччы дьайыытынан үлэлээбит буоламмын, сүрдээх мындырдык, демократичнайдык, киһилии, дьиҥ сахалыы салайбыта диэхпин баҕарабын.

Ол иһигэр бары олохтоох бэйэни салайыныы баһылыктарын кытта дьиҥнээх аҕа табаарыстыы сыһыаннаһан, кими да аһара өрө туппакка, кими да аһара аллараа баттыы сатаабакка, тэҥҥэ тутан, тэҥҥэ сыһыаннаһан.

Мин куруук этэбин: сахалар салайааччыларбытыгар сүрдээҕин табыллыбыт дьоммут, сэбиэскэй былаас саҕаттан. Ама ким Аммосовы, Ойуунускайы, Бараахабы мөлтөх салайааччылар этэ диэҕэй? Аҕыйах соччото суох дьон баар буола сылдьыбыттарын ахтыбакка, аҥаардас Илья Винокуровы, Семен Борисовы, Гаврил Чиряевы, Юрий Прокопьевы да ааттаатахха, бары бэйэлэрин кэмнэригэр саамай сөптөөх үлэни ыыппыт саха саарыннара этэ эрэ диир кыахтаахпыт.

Онтон саҥа кэм үс Президеннэрэ эмиэ хас биирдиилэрэ оччотооҕу историческай кэм, экономическай быһыы-майгы, федеральнай киин ыытар политикатын ирдэбиллэригэр толору эппиэттэһэр дьоһуннаах дьон дьоһуннаахтык үлэлээбиттэрэ, үлэлээтилэр. Киһиэхэ барытыгар бэрт буолар кыах суох, хаһан баҕарар астыммат, сөбүлээбэт, абааһы көрөр дьон баар буолалларын да үрдүнэн, хас биирдиилэрин үлэлээбит кэмнэрэ - туспа историческай кэм-кэрдиис.

Ол курдук, Михаил Ефимович Николаев эпохата - отой туһунан улуу история, Вячеслав Анатольевич Штыров киэнэ эмиэ туспа сайдыы, үлэ-хамнас кэмэ, Егор Афанасьевич Борисов киэнэ эмиэ оннук бэйэтин уратытынан биһиги өйбүтүгэр-санаабытыгар хаалыаҕа. Бу сылларга кини уонна кини хамаандата, бастатан туран, биллэрин курдук, Галина Данчикова сүҥкэн үлэни үлэлээн, сарыннарыгар сүгэн кэллилэр.

Кини аата, мин санаабар, тыа сиригэр элбэх тутуу барбытын кытта, чааһынай дьоҥҥо дьиэ тутталларыгар субсидия, эдэр ыалларга көмө, үүт харчыта улаатааһына, саҥа таас оскуолалары, спортивнай, социальнай, промышленнай объектары тутууну кытта уонна Дьокуускай куоракка баараҕай спортивнай, культурнай объектары кытта сибээстээх буолуо дии саныыбын.

Кини быһаччы көҕүлээһининэн уонна тэрийиитинэн спортивнай оонньуулары ыытыы улуус таһымыгар аарыма тутуулары кытта быһаччы сибээстээх. Итинник улахан объектары тутуу, мин өйдүүрбүнэн, Штыров-Акимов саҕана Сунтаарга буолбут спортивнай оонньуулартан саҕаламмыта.

Егор Афанасьевич, оччолорго бырабыыталыстыба бэрэссэдээтэлэ буолан олорон, ол тутуулар үптэрин-харчыларын көрөөһүнү быһаччы дьаһайбыта мөккүөрэ суох. Онтон ыла хас спортивнай оонньуу аайы сабыс саҥа аныгылыы тупсаҕай стадионнар, спортзаллар улуус-улуус аайы тутуллан, килбэйэн тураллара, дьону-сэргэни куруук үөрдэ-көтүтэ, чөл олоххо, спортка ыҥыра-угуйа туруохтара.

Ити эрэ буолуо дуо? Мин санаабар, кини биир улуу дьыалата уонна инники Президеннэртэн уратыта диэн: олохтоох бэйэни салайыныы дьиҥнээхтик саха менталитетыгар сөп түбэһэрин бигэтик өйдөөн, сүрэҕинэн-быарынан ылынан кинини, олохтоох бэйэни салайыныыны, система, былаас биир туспа институтун курдук көрөн бигэтик атаҕар туруорбута буолар.

Бу сылларга баһылыктарга, депутаттарга аналлаах элбэх семинар, баһылыктар уонна бырабыыталыстыба бииргэ мунньахтыыр анал сэбиэт мунньахтара, уопсай политика оҥорууга аналлаах нэһилиэктэр, улуустар баһылыктарын съезтэрэ үрдүк тэрээһиннээхтик, өрө күүрүллээхтик ыытыллан кэллилэр, дьону-норуоту күүскэ сомоҕолоотулар, инникигэ эрэли сахтылар, баһылыктарга күүстээх өйөбүл буоллулар диэххэ наада.

Кыра уонна орто бизнес сайдарыгар эмиэ дьоһуннаах хардыылар оҥоһуллубуттара. Ол курдук, элбэх улууска "бизнес-инкубатордар" тутуллубуттара. Элбэх үп-харчы, предпринимательства фондатын нөҥүө чэпчэтиилээх кредит быһыытынан бэриллэн, улуус аайы саҥа бизнес үөскүүрүн күүскэ көҕүлээтэ.

Аҥардас Үөһээ Бүлүүгэ ол кредиттэринэн пекарня, гостиница, ресторан, тутуу матырыйаалларын оҥорон таhаарар дьоҕус собуоттар тигинэччи үлэлии тураллар. Бу сылларга ити курдук элбэх үлэ барда, барытын биир ыстатыйаҕа киһи сатаан ахтар да кыаҕа суох.

Ол иһин, былырыыҥҥы XX юбилейдаах Манчаары оонньуутун мин дойдубар - Үөһээ Бүлүүгэ - ыыттарар быһаарыныы ылынан уонна күүскэ өйөөн, билиҥҥи Үөһээ Бүлүү тупсубутун, киэркэйбитин сылдьыбыт эрэ барыта сөҕөр-махтайар буолбутуттан уонна өрөспүүбүлүкэни салайан олорор кэмигэр биһиги улууска өрүү күүс-көмө буолан олорбутун туһугар, Егор Афанасьевичка Үөһээ Бүлүү улууһун олохтоохторун ааттарыттан дириҥ ытыктабылбытын, убаастабылбытын уонна махталбытын тиэрдэбин! Доруобай буол, этэҥҥэ буол, дьоллоох буол!

Эн бэйэҥ оннугар хаалларбыт саха биир чаҕылхай уола - Айсен Николаев - быыбары эрэллээхтик кыайыа, кини иннинээҕи өрөспүүбүлүкэбит бастакы сирэй салайааччыларын курдук уонна эн курдук олоҕун дьонун-норуотун, тапталлаах Сахатын Сирин туһугар аныа диэн эрэнэрбин биллэрэбин!

Туругурдун Улуу Арассыыйа!

Туругурдун Саха Өрөспүүбүлүкэтэ!

Туругурдун Саха Омуга!

Владимир Поскачин, Үөһээ Бүлүү улууһун баһылыга. 2018 с., ыам ыйын 30 күнэ.

2018-05-30 18:35:41

Всего просмотров: 1423