В парламенте
Александр Жирков: Тимири уһаарыы, тимири уһаныы бу тыйыс сиргэ саханы саха оҥорбута
 Балаҕан ыйын 10 күнүгэр Саха Өрөспүүбүлүкэтин Ил Түмэнин Бэрэссэдээтэлин бастакы солбуйааччы Александр Жирков Дьокуускайга «Айар уустар» креативнай индустрия колледжыгар «Уус кыһатын кыыма, күөрт уотун күүһэ» диэн тэрээһиҥҥэ сырытта. Манна өрөспүүбүлүкэ улуустарыттан тимир уустара, колледж маастардара араас оскуолалартан ыҥырыллан кэлбит оҕолорго, устудьуоннарга былыргы ньыманан тутуллубут оһоххо тимири уһаарыыны көрдөрдүлэр. Оҕолор тимири уһаарыыга, эллээһиҥҥэ бэйэлэрин күүстэрин холонон көрдүлэр.
Александр Жирков мустубут ыччаттарга уонна үөрэнээччилэргэ туһаайан этиитигэр тимири уһаарыы, тимири уһаныы биһиги тыйыс дойдубутугар саханы саха оҥорбута, манна олохсуйарбытыгар, тарҕанарбытыгар сүрүн төһүү буолбута диэн бэлиэтээтэ.
– Саха дьоно, саха омуга сымара тааһы уулларан болгуо тимири уһаарар, тимир оҥоһуктары оҥорор уустук ньыманы баһылаан бу ирбэт тоҥ буордаах сиргэ-дойдуга дьиэ-уот туттан, сүөһү-ас тэринэн, тэнийэн олохсуйар кыахтаммыта. Бу үйэлээх дьарык, ытык үгэс быста-быста салҕанан күн бүгүнүгэр диэри тиийэн кэллэ. Инники өттүгэр сайдыахтаах уонна тэнийиэхтээх диэн биһиги баҕа санаалаахпыт. Ол иһин бүгүн манна ыччат дьон, оҕолор кэлбиттэрэ улахан суолталаах. Оҕолор, ыччаттар, эһиги иннигитигэр саха тимири уһаарар оһоҕо оттуллан, күөдьүйэн турар. Бүгүн киэһэ бу оһохтон тимир болгуо уһаарыллан ылыллыаҕа. Ол тимиртэн биһиги өбүгэлэрбит – саха уустара быһах тимириттэн, анньыы төбөтүттэн, хойгуотуттан, булка, кыргыһыыга туттуллар сэпкэ-сэбиргэлгэ тиийэ уһанан таһаараллара. Саха тимири уһанар үгэһин биир кылаан чыпчаала – бэйэтин үйэлээх дьүрүскэнинэн Аан дойдуну абылаабыт саха хомуһугар тиийэ оҥорон таһаараллара. Саха тимир, көмүс оҥоһуга билигин Аан дойду үрдүнэн кэрэхсэнэр. Ол барыта биһиги өбүгэлэрбит бэйэлэрин үрэхтэрин, өрүстэрин кытылларыттан, хайаларын, сыырдарын тэллэхтэриттэн булбут таастарыттан, бэйэлэрэ сыбаан туруорбут оһохторугар уһааран ылбыт тимирдэриттэн уһаарыллан, оҥоһуллан тахсыбыта, биһиги үрдүк үгэспит олохсуйбута. Ол иһин бу ытык үгэс хайаан да үйэлээх буолуохтаах. Ону утумнааччыларынан эдэр дьон - эһиги буолуоххут! Эһиги искититтэн кэнэҕэскитин аар саарга аатырар уустар, дьон киэнэ мындырдара, ураннара уһаарыллан тахсыахтара. Эһиги бука барыгыт иннигитигэр өбүгэлэргит төрүт дьарыктарын, ытык идэлэрин салгыы тарҕатар улахан сорук турар. Этэҥҥэ буолуҥ!
Салгыы тэрээһин чэрчитинэн мустубут ыалдьыттар уонна ыччаттар «Айар уустар» колледж маастардарын уонна үөрэнээччилэрин быыстапкаларын көрдүлэр-иһиттилэр, маастар-кылаастарга кыттыыны ыллылар.
Бу өрөспүүбүлүкэ таһымнаах дьоһуннаах тэрээһини СӨ культуратын уонна үөрэҕин министиэристибэлэрэ, «Айар уустар» колледж салалтата, биллиилээх тимир ууһа, норуот маастара Роман Готовцев салайааччылаах «Саха уустарын түмсүүлэрэ» тэрилтэ көҕүлээн тэрийдилэр.
Санатан эттэххэ, «Айар уустар» колледж – бу норуот төрүт-уус үгэһин сөргүтэр, тарҕатар уонна үйэтитэр ураты суолталаах уонна соруктаах саҥа хайысхалаах үөрэх кыһата буолар. Билигин бу колледжка 400 тахса ыччат үөрэнэр.
Ил Түмэн пресс-сулууспата 2024-09-12 00:56:53 Всего просмотров: 39 Поделиться: 
Ссылки по ключевым словам:
2024-10-01 08:57:08 - Поздравление Главы Республики Саха (Якутия) Айсена Сергеевича Николаева с Международным днем пожилых людей 2024-10-01 08:54:56 - Глава Якутии Айсен Николаев встретился с Президентом Республики Беларусь Александром Лукашенко 2024-09-29 03:43:29 - На Хандыгской нефтебазе АО «Саханефтегазсбыт» прошли учения по безопасности
2024-09-27 04:18:21 - Поздравление Евгения Григорьева с Днем государственности Республики Саха (Якутия) 2024-09-26 05:04:14 - В Республике Саха (Якутия) досрочно ввели в эксплуатацию два участка трассы Р-504 «Колыма»
2024-09-14 01:32:46 - Александр Жирков: Ийэ дойдуга таптал төрүт түөлбэттэн саҕаланар 2024-09-12 00:56:53 - Александр Жирков: Тимири уһаарыы, тимири уһаныы бу тыйыс сиргэ саханы саха оҥорбута 2024-09-10 07:38:14 - Александр Сусоев о депутатской деятельности 2024-09-08 09:15:52 - Поздравление Главы Республики Саха (Якутии) Айсена Сергеевича Николаева с Днём города Якутска 2024-09-06 08:07:47 - На полях ВЭФ-2024 подписано соглашение о железнодорожных контейнерных перевозках в Республику Саха (Якутия) |
