Общественно-политическая интернет-газета

"V Якутии.ру" интернет-хаһыакка сэрэйиллэр биричиинэнэн аатын ааттаабаппытыгар көрдөһөр Уус-Алдан улууһун олохтооҕо, баһылык быыбара сиэрдээхтик барарыгар ис сүрэҕиттэн кыһаллар киһи бэйэтин санаатын тиэртэ:

-- Быыбар чугаһаатаҕын аайы биһиги үөлээннээхпит, улууспут биир ытыктанар киһитэ Василий Иванович Аммосов аатын алдьатарга анаммыт “хара пиар”, олоҕо суох холуннарыы саҕаламмыта дьиксиннэрэр. Биһиги санаабытыгар кинини улуус баһылыгын дуоһунаһыттан төрүт сокуоннайа суохтук, була сатаан, улуус иһинээҕи бэрт былдьаһыы содулугар устубуттарын үрдүнэн, аны букатын да сымыйа дьаралыгы сыһыаран эрэллэр.

Ол курдук, холуобунай дьыалаҕа эриллэн сууттаммыта диэн буолла. Онтулара дириҥээтэр дириҥээн иһэр. Холобур, бассаап-бөлөхтөргө бюджет үбүн куорҕаллааччы курдук суруйаллар, ардыгар “уорбут”, “иҥэриммит” дииллэр. Ол дьон санаатыгар хайдах дьайара биллэр, — хоруупсуйа туох-ханнык иннинэ уорууну кытта сибээстээх буоллаҕа.

Бу сымыйа сурах-садьык ким быыбардыыр штабыттан силистэнэн-кутуруктанан тахсара, ким интэриэһигэр үлэлиирэ өйдөнөр. Туох да диэбит иһин, “суут” диэн тыл дьоҥҥо үксүгэр олус куһаҕаннык иһиллэр, ханнык эрэ ыар буруйу оҥорууну, көҥүлү быһар бириигэбэри кытта ситимнээх.

Дьиҥэ, Аммосовы утары ханнык да холуобунай дьыала тэриллибэтэҕэ. Хоруупсуйаҕа күтүрэнэр административнай дьыала суукка көрүллүбүтэ.

Ол туһунан эһиги интернет-хаһыаккыт бу дьыл ыам ыйын 19 күнүгэр, ол эбэтэр өссө праймериз иннинэ суруйан турар. Онно эксперт этиитигэр олоҕуран саамай сөптөөхтүк этиллибит этэ: "Аммосов улуус баһылыгын уонна “Биир ньыгыл Арассыыйа” сэкиритээрин дуоһунастарыттан хоруупсуйаҕа сыһыаннаах быраабы кэһии иһин ууратылынна, — ханнык да холуобунай буруйу оҥоруу иһин, ону кытта суут буруйдуур бириигэбэринэн буолбатах" . https://t.me/vyakutiaru/112030

Дьэ, ол “хоруупсуйаҕа сыһыаннаах” дьыала ис дьиҥэ туохха сытарый?

Улуус баһылыгын ааспыт быыбарын кэнниттэн, 2023 сыл алтынньы ыйыгар, Уус-Алдан улууһун дьаһалтатын Инфраструктураҕа уонна олоҕу хааччыйыыга управлениетын начаалынньыгын эбээһинэһин быстах кэмҥэ толорооччунан дьаһалтаҕа өссө Алексей Федотов баһылыктыырын саҕана үлэлии киирбит гражданка N анаммыта.

Сотору буолаат гражданка Иванова прокуратураҕа үҥсүү киллэрэр: N улуус саҥа талыллыбыт баһылыга Аммосовтан оҕолоох, онон кинини үлэҕэ ылыы хоруупсуйа биир көстүүтэ буолар диэн. Бэйэҕит да өйдүүргүт буолуо, оройуоннааҕы прокуратура бу дьыалаҕа “утуйар уутун умнан туран” түһүммүтэ. Ол курдук, улуус дьаһалтатыттан N үлэҕэ ылыы докумуоннарын таһынан, управление үлэтигэр сыһыаннаах бары докумуоннары суйдаан барбыттара.

2024 сыл алтынньы 31 күнүгэр Уус-Алдан оройуонун прокурорун солбуйааччыта Д.И. Семенов оройуон баһылыга В.И. Аммосов итэҕэлтэн тахсыбытынан сибээстээн, “хоруупсуйаны утары сокуон хааччахтарын тутуспатаҕын быһыытынан дуоһунаһыттан болдьоҕун иннинэ аккаастаныахтаах” диэн Райсовет бэрэссэдээтэлэ И.И. Аммосов аатыгар туруорсар.

Райсовет депутаттара бу боппуруоһу 2024 сыл сэтинньи 29 күнүгэр дьүүллэспиттэрэ уонна прокуратура туруорсуутун ылымматахтара. Ол эбэтэр, депутаттар кинини өйөөбүттэрэ, — баһылык уонна гражданка N урукку сыһыаннарын уонна кинилэр уопсай оҕолоохторун туһунан туһааннаах былаас уорганыгар биллэрбэтэҕин хоруупсуйаны утары сокуону кэһии курдук көрбөтөхтөрө.

Салгыы туох буолбутун бары бэркэ билэбит.

Прокуратура Райсовет быһаарыытын ылымматаҕа уонна Василий Аммосов суут нөҥүө улуус баһылыгын дуоһунаһыттан уурайарын ситиспитэ. Ону таһынан “Биир ньыгыл Арассыыйа” партия олохтоох салаатын сэкирэтээрин дуоһунаһыттан босхолообуттара.

Быһата, биһиги улууспут баһылыгын кириэһилэтэ босхолонорун туруулаһар политическай күүс баар.

Билэргит курдук, болдьоҕун иннинэ быыбар анаммыта, онно Василий Аммосов, төһө да харгыстыы сатаабыттарын үрдүнэн турда уонна хайаан да итэҕэтиилээхтик кыайарга сананан сылдьар. Таарыйа эттэххэ, кинини уураппыт суут уурааҕын көтүрэр туһугар юридическай үлэни ыытар.

Тоҕо диэтэххэ, Аммосов кырдьык иһин сылдьар. Кини ханнык да коррупционер буолбатах. Холуобунай дьыалаҕа эриллибит дуу, буруйдуур бириигэбэри истибит дуу бөрөстүүпүнньүк буолбатах.

Төттөрүтүн, олоҕу билбит дьон этэллэринэн, Василий Иванович Аммосов, — дьиҥнээх эр киһи, эппиэтинэһи ылынартан куттаммат аҕа, сахалыы сиэр-майгы баар киһитэ эбит.

Райсовет кинини дуоһунаһыттан босхолуур мунньаҕар кини маннык диэн турар: "N үлэтиттэн уурайбыта. Аҕа быһыытынан оҕобуттан аккаастанар санаам суох. Ол эрэн N кытта бииргэ олорбоппут, уопсай хаһаайыстыбабыт суох. Дьиҥинэн сэрэтиинэн бүтүөн сөп этэ. Мин сабаҕалыырбынан, ыал быһыытынан саахсаламматах буоллахпытына, дьыаланы ойоҕостон (косвенный) интэриэс курдук ылыныахтарын сөп этэ. Оҕолоох буоллубут да быһаччы интэриэстээх дьон курдук көрүллүөхпүт дии санаабатаҕым. Кырдьыга да, биһиги бары улууспут сайдыытын туһугар үлэлии сылдьабыт. Ханнык да кэтэх интэриэс диэн суох".

Олоххо араас буолар, Айыы Таҥара суолун-ииһин ким да билбэт... Дьон дьылҕата эрдэттэн суруллубут сценарий курдук барбат.

Дьиҥнээх эр бэрдэ, боростуой буор саха киһитэ сокуоннайа суох төрөөбүт оҕотун билиммитэ хайҕаллаах быһыы. Киһи эрэ барыта кыайбат быһыыта.

Сөбүлэһэргитигэр тиийэҕит: баар уонна инникитин кэтэһэр эппиэтинэһи бэйэтигэр ылынар эр бэрдэ бэйэтин оҕотуттан хаһан да аккаастаммат.

Дьэ, ол иһин мин Василий Ивановиһы убаастыырым өссө күүһүрдэ. Кэлэн иhэр быыбарга чахчы да кыахтаахтык, итэҕэтиилээхтик кыайыа диэн эрэнэбин. Василий Иванович, быыбарга кыайаҥҥын улууспут сайдыытын туһугар туох баар кыаххын, билиигин-көрүүгүн уонна дойдугар тапталгын ууран туран чаҕылхайдык уонна үтүө түмүктээхтик үлэлииргэр баҕарабын! Дьон-сэргэ Эн диэки, Василий Иванович! Кытаат!

2025-08-31 08:29:12

Всего просмотров: 72