В улусах
Бэҕэһээ киэһэ Ээйик уотун умуллардылар
 Авиалесоохрана пресс-сулууспата иһитиннэрбитинэн, Өлөөн улууһун уһук нэһилиэгэр, Солоҕооҥҥо, от ыйын 23 күнүгэр туран баран, бөһүөлэккэ суоһуу сылдьыбыт уоту атырдьах ыйын 13 чыыһылатын киэһэтигэр дьэ бүтэһиктээҕин саба туппуттар.
Уот туран эрэрин салгын аалын патрула былааннаах көтүү кэмигэр булбута. Маҥнай саҕаланарыгар 2 гектардаах көрдүгэн 190 гектарга тиийэ тыаны, ходуһаны салаан тарҕаммытын кэнниттэн тохтотулунна. Уот икки аҥыы арахсан, тарҕанан, биир өттө Ээйик бөһүөлэгин дьиэлэригэр кимитэлээн, кутталы үөскэтэ сырытта.
 Баһаары бохсууга Авиалесоохрана 95 парашютист-десантнига кытынна. Чугастыы Үөһээ Бүлүү, Ньурба, Сунтаар улуустарынааҕы уонна саҥа тэриллибит Эдьигээннээҕи авиаотделениелартан байыастар тиийэн үлэлээтилэр. Кинилэргэ олохтоох дьонтон 25 киһи уонна Саха сирин Быыһыыр сулууспатын 5 үлэһитэ көмөлөстүлэр. Барыта 17 тиэхиньикэ туһанылынна.
Кураан, куйаас күннэр тураннар, эбиитин халлаан тыалыран-кууһуран уонна сирэ туорпа буолан, көрдүгэннээн тахсан салгыы умайа турарынан, сүгүн кыайтарбакка, сүүрбэччэ күннээх түүнү быһа турууластылар. Кытаанах, сыралаах охсуһууттан кыайыылаах тахсыбыт байыастарга хотугу улуус уонна нэһилиэк салалталара, дьоно-сэргэтэ махталларын тириэрдэллэр.
 Василий Никифоров
Хаартыскаҕа: Эдьигээннээҕи авиаотделение байыастара Ээйик уотугар кытаанах сүрэхтэниини аастылар.
Подробнее: https://ulus.media/2026/08/14/be%d2%95e%d2%bbee-kie%d2%bbe-eejik-uotun-umullardylar/
2026-08-14 06:09:03 Всего просмотров: 15 Поделиться: 
Ссылки по ключевым словам:
2026-08-14 06:09:03 - Бэҕэһээ киэһэ Ээйик уотун умуллардылар |
