Сахалыы сыhыарыы
КЭРИЭСТЭБИЛ. Дьон өйдүүрүн тухары – киһи тыыннаах
 Күндүтүк саныыр коллегабыт, аҕа табаарыспыт, истиҥ доҕорбут, Чурапчы улууhун Одьулуун нэһилиэгиттэн төрүттээх Пелагея Молотовна КАРДАШЕВСКАЯ бу дьыл сэтинньи ый 4 кунугэр, 65 сааһыгар, ыарахан ыарыыттан биһиги кэккэбититтэн соһуччу туораабыта номнуо 40 хонуга буолла.
Пелагея Молотовна 1955 сыллаахха тохсунньу ый 4 күнүгэр Кардашевскайдар дьиэ кэргэннэригэр бастакы оҕонон күн сирин көрбутэ. Мындаҕаайы орто оскуолатыгар уон кылааһы бүтэрэн баран, "Оскуола – Производство – Үрдүк үөрэх" диэн девиhинэн төрөөбүт Одьулуунугар ыанньыксытынан үлэлээбитэ.
1975-1980 сс. Саха судаарыстыбаннай университетын Тыа хаһаайыстыбатын факультетыгар зооинженер идэтигэр үөрэммитэ. Студенныыр сылларыгар эмиэ биэс тарбахха баттанар чулуу студент, комсомуолка этэ. Сайаҕас, барыга көхтөөх, тэрийэр дьоҕурдаах, факультетыгар актыбыыс, “Мичээр” агитбригада солбуллубат конферансьета этэ.
Дьону бэйэтин тула түмэр, сирдиир, көҕүйэр, кынаттыыр, араҥаччылыыр дьоҕура киниэхэ эдэр сааhыттан баара. Кинини мэлдьи дьүөгэлэрэ, бииргэ үөрэммит доҕотторо, кэлин бииргэ үлэлиир үөлээннээхтэрэ, эдэр специалистар тулалыыллара. Тиһэх күннэригэр диэри.
1980 с., үөрэҕин бүтэрээт, Тыа хаhаайыстыбатын Министиэристибэтин анааһынынан, үлэтин Бүлүү оройуонугар “Мастаах” совхоз Халбаакытааҕы салаатыгар зоотехнигынан саҕалаабыта. Барытыгар дэгиттэр билиилээх эдэр специалист үлэ үөһүгэр түспүтэ. Анаммыт үлэтигэр бэриниилээх буолан, сүүрбэ сыл устата бары күүһүн-кыаҕын ууран, ситиһиилээхтик үлэлээбитэ. Зоотехниктан саҕалаан, совхоз ыһыллыбытын кэнниттэн производственнай кооперативка сэбиэдиссэй солбуйааччытынан, профком салайааччытынан таһаарыылаахтык үлэлээбитэ.
2000-2001 сс. Дьокуускайга “Бүлүү” ҮХАПХ ААУо бэрэстэбиитэлистибэтигэр улэлээбитэ. Ити кэмҥэ уопуттаах улэhит сүрүннүүр министиэристибэ иһинэн тэриллибит тыа хаһаайыстыбатын бородууксуйатын уонна сиэмэ хаачыстыбатын хонтуруоллуур инспекция специалиһынан, онтон салайааччытынан ананар. Манна кини 2011 сылга диэри үлэлиир.
Онтон Дьокуускай куорат тыатын хаһаайыстыбатын дьаhалтатын салайааччытын солбуйааччытынан элбэх сыллар усталарыгар айымньылаахтык үлэлээбитэ. Кэлиҥҥи сылларга Пелагея Молотовна “Туймаада” Агрохолдинг” АУо тыа хаһаайыстыбатын управлениетыгар салайааччынан ананан бэрт кэскиллээх үлэни ыыппыта.
Сатабыллаах тэрийээччи, ылыннарыылаах тыллаах, үрдүк таһымнаах профессионал, көнө сүрүннээх доҕор, хаһан даҕаны санаатын түһэрбэт, олоххо сэргэх көрүүлээх киһи быһыытынан кини үлэлиир коллективыгар, алтыһар эйгэтигэр улаханнык ытыктанар этэ. Олорор олоҕун астынара, үлэтин сөбүлүүрэ, кыайа тутара.
“Аналлаах үлэбин лоп-бааччы толорон, кыайа-хото тутан сылдьарым миэхэ үчүгэй, санаабар астык”, - диир буолара.
Пелагея Молотовна өр сыллаах сыралаах үлэтэ үрдүктүк сыаналанан “Саха Өрөспүүбүлүкэтин тыатын хаhаайыстыбатын үтүөлээх үлэһитэ” бочуоттаах ааты ылбыта, “Саха Өрөспүүбүлүкэтин тыатын хаһаайыстыбатын туйгуна” бочуоттаах знагынан, Саха Өрөспүүбүлүкэтин государственноһын бөҕөргөтүүгэ, социальнай-экономическай сайдыытыгар киллэрбит улахан тус кылаатын иһин Саха Өрөспүүбүлүкэтин Президенин, Правительствотын, Ил Түмэн, Тыа сирин профсоюзтарын элбэх анал бэлиэлэринэн, Бочуотунай грамоталарынан, махтал суруктарынан наҕараадаламмыта.
Пелагея Молотовна улахан аймах биир тумус туттар киһитэ, дурдата-хаххата этэ. Дьоно-сэргэтэ мэлдьи кини сүбэтинэн салайтараллара. Сүрдээх аймаҕымсах-уруумсах киһи этэ. Наар кэһиилээх-тутуурдаах, ийэлии эйэҕэс, сахалыы сайаҕас буолара. Балтыларыгар олус истиҥ сыһыаннааҕа.
Хатастааҕы дьиэлэригэр араас эриэккэс үүнээйилэри сөбүлээн үүннэрэрэ, күндүргэтэн бүөбэйдиирэ, көрөрө-харайара. Эйэҕэс-сайаҕас, сайдам-дьэллэм буолан, үгүс доҕоттордоох этэ. Көрдөөх-нардаах, дьээбэлээх, кэпсээннээх буолан, үөрүүлээх түмсүүлэри көҕүлүүрэ, киэргэтэрэ. Оскуолаҕа, студент сылларынааҕы бииргэ үөрэммит доҕотторун кытта мэлдьи бииргэ сылдьара.
Пелагея Молотовна кэргэн, ийэ, эбээ быһыытынан чугас дьонугар олус истиҥ сыһыаннааҕа. Дьоҥҥо-сэргэҕэ элэккэй, истиҥ сыhыаннаах, табаарыстарыгар, доҕотторугар бэриниилээх таас-тирэх киhи этэ.
Кини ис эйгэтэ олус ыраас, сырдык, баай, киэҥ этэ.
Эдьиийбит тус олоххо, улэҕэ толору толкуйа, эппиэтинэстээх сыhыана, холку майгыта, сахалыы дириҥ санаата биһигини өрүү араҥаччылыы, харыстыы, көмүскүү сылдьыаҕа... Оттон биһиги сүрэхпитигэр, куппутугар-сүрбүтүгэр сылаас, сырдык, үтүө өйдөбүл өрүү баар буолуоҕа.
“Туймаада” Агрохолдинг аахсыйалаах уопсастыба кэлэктиибэ. Ахсынньы ый 13 күнэ, 2021 сыл.
Источник: сайт Агрохолдинга "Туймаада". 2021-12-13 08:11:45 Всего просмотров: 404 Поделиться: 
Ссылки по ключевым словам:
2023-06-22 08:43:03 - Александр Жирков: Чурапчы аата, саха аата үйэлэр тухары ааттана, дуораһыйа турдун! 2021-12-13 08:11:45 - КЭРИЭСТЭБИЛ. Дьон өйдүүрүн тухары – киһи тыыннаах 2020-05-27 08:18:46 - Иван КУЛЬБЕРТИНОВ аҕатыгар анаммыт памятник эскиһин сөбүлээбэтэх
2018-03-09 08:54:47 - Саха киһитин санаатын сааһылыыр кэмэ кэллэ 2017-03-02 09:07:16 - Цеолит—тыыннаах таас 2016-07-20 15:23:41 - Киһи олоҕун 1 тыһыынчаҕа сыаналыыр тойоттор
2013-07-01 12:52:49 - Аанньаахха биир мандаттаах уокурукка икки киһи Ил Түмэн быыбарыгар кыттар баҕатын биллэрдэ
2013-07-01 12:49:49 - Ньурбаҕа биир мандаттаах Ил Түмэн быыбарыгар түөрт киһи регистрацияланна
|
