В республике
Ытыктабыллаах Саха сирин олохтоохторо, тыа сирин туруу үлэһиттэрэ!
Саха Өрөспүүбүлүкэтин салалтатын аатыттан уонна тус бэйэм эһигини Сайылык күнүнэн эҕэрдэлиибин!
Бу бырааһынньык томороон тымныылар кэннилэриттэн айылҕа уһуктар, тыллар, силигилии ситэр, үрүҥ тунах үрүлүйэ устар кэмэ күүтүүлээх сайыммыт кэлбитин туоһулуур. Сайылыкка көһөн тахсыы – саха норуота былыр-былыргыттан олохтообут үтүө үгэһэ. Биһиги төрүттэрбит бу күнү үөрэ-көтө көрсөллөрө – сүөһүлэрин мэччирэҥҥэ таһаараллара, бэйэлэрэ оҕолорун илдьэ дьиэ кэргэнинэн сайылыктарыгар көһөн тиийэллэрэ, дьиэлэрин-уоттарын оҥостоллоро, аймахтарын-доҕотторун кытта түмсэллэрэ-көрсүһэллэрэ.
Сайылык илгэлээх олоҕо саҕаланара, сайын устата хойуу оттоох ходуһаҕа мэччийбит, күөххэ көччүйбүт ынах сүөһү сыллааҕы үүтүн баһыйар аҥаарын ыыллара. Бу кэмҥэ ыаммыт үүт амтана, туһата хайа да кэмнээҕэр күүһүрэр. Бүгүн өрөспүүбүлүкэбитигэр сайылык хаһаайыстыбаларын сөргүтүүгэ, сайыннарыыга – сайылыктары тутууга, элэктэриичэстибэ уотунан, техникэнэн, оборудованиенан хааччыйыыга, үлэһиттэргэ табыгастаах олоҕу - дьаһаҕы тэрийиигэ тус сыаллаах үлэ ыытыллар.
Бу күннэргэ Саха сирин үрдүнэн 355 сайылыкка 1648 киһи көһүөҕэ. Онно 41 тыһыынча сүөһүнү илдьэ тахсыахтара. 2022 сылга тыа хаһаайыстыбата хаһааҥҥытааҕар да муҥутуурдук үбүлэниэҕэ. Тыа хаһаайыстыбатыгар биир тумус суолталаах сорукпут – саха ынаҕын чөл хаалларыы. Саха ынаҕын ууһатыынан өрөспүүбүлүкэ 14 улууһугар, ону сэргэ Дьокуускай куоракка дьарыктаналлар. Быйыл ыам ыйын 22 күнүгэр Нам улууһун Таастаах сэлиэнньэтигэр “Саха ынаҕа” хааһына тэрилтэтин баазатыгар саха ынаҕын генопуондатын ууһатыы научнай киинэ арыллыаҕа. Манна саҥа сайылыгы уонна саҥа хотону тутуу түмүктэннэ. 2024 сылга саха ынаҕын ахсаанын 3 тыһыынчаҕа тиэрдэр сорук турар.
Бу үтүө бырааһынньык күн тыа сирин туруу үлэһит дьонугар таһаарыылаах үлэҕит, төрүттэрбит үтүө үгэстэрин чөл хаалларыыга ахсаабат сыраҕыт иһин махталбын тиэрдэрбин көҥүллээҥ.
Күндү биир дойдулаахтарым!
Эһиэхэ кытаанах доруобуйаны, уҕараабат эрчими, дьолу-соругуну, этэҥҥэ буолууну, эйэлээх халлааны баҕарабын! Күүтүүлээх самаан сайыммыт эһиэхэ илгэтиттэн өлгөмнүк бэристин, төрөөбүт сиргитигэр-уоккутугар үлэттэн дуоһуйууну ылан ситиһиигит үксээтин!
Саха Өрөспүүбүлүкэтин Ил Дархана А.С. Николаев 2022-05-22 02:26:41 Всего просмотров: 367 Поделиться: 
Ссылки по ключевым словам:
2025-06-21 11:33:46 - Күндү биир дойдулаахтарым, ытыктабыллаах Дьокуускай куорат олохтоохторо, ыраахтан-чугастан ыҥырыллан кэлбит ытык-мааны ыалдьыттар! 2024-10-13 06:12:57 - Тыа хаһаайыстыбатын уонна астыыр-үөллүүр салаа үлэһиттэрин күнүнэн 2022-05-22 02:26:41 - Ытыктабыллаах Саха сирин олохтоохторо, тыа сирин туруу үлэһиттэрэ! 2020-02-13 03:18:25 - Ытыктабыллаах Сахам сирин олохтоохторо! 2011-12-26 11:47:19 - Саха сирин бары олохтоохторугар Таатта улууһун
быыбардааччыларын аһаҕас суруга! 2011-12-21 13:49:25 - Саха сирин олохтоохторугар туһаайан Афанасий Максимов аймахтарыттан Аһаҕас сурук 2010-12-28 23:08:59 - «Ваучер» Федоров үлэһиттэрин 50%-нын сарбыйда. Үтэһэ туолбата тоҕо сүрэй?! |
