Сельское хозяйство и АПК
Кыстыкка киирии кэминэн бара турар
 Быйылгы кыстыкка киирии бары хаһаайыстыбаларга этэҥҥэ кэмигэр баран иһэр. Билигин күһүн уһаан, төһө да уһуннук ардыы турдар сир тоҥо илик. Онон хаһаайыстыбалар сүөһүлэрин күнүскү өттүгэр үксүн бааһыналарга, чугас эргин мэччитэллэр.
«Туймаада» Агрохолдинг хаһаайыстыбалара бу күннэргэ 3802 ынах cүөһүнү кыстык хотонугар аҕаллылар. Ол иһиттэн ынаҕа 1797 уонна ыччат сүөһүтэ 2005 төбө. Бу ый саҥатынааҕы туругунан 6943,2 туонна от бэлэмнэммит. Итини таһынан 5449 туонна сиилэс уонна 1207 туонна сенаж бэлэмнээн кыстыкка аһылыктарын хааччыммыттар.
Биирдиилээн хаһаайыстыбаларынан ылан көрдөххө Хаҥалас улууһун Улахан Аан нэһилиэгэр баар “Бөртө сылгы собуота” ХЭТ быйылгы кыстыкка 1188 ынах сүөһүлээх киирэн эрэр. Ол иһиттэн ынаҕа 416 төбө. Ону таһынан бу хаһаайыстыба 772 ыччат сүөһүлээх. Бу кыстыкка Бөртөлөр 2672 туонна оттоох, 1255 туонна сиилэстээх уонна 487 туонна сенажтаах киирэн эрэллэр.
Онтон агрохолдинг биир улахан хаһаайыстыбата “Туймаада” Экоферма икки отделениенан 1042 сүөһүнү хотоҥҥо киллэрбиттэр. Ол иһиттэн ынаҕа 567, ыччата 475. Хаһаайыстыба быйылгы сайын улахан курааны көрсөн сиилэс бэлэмнээһинигэр уустуктары көрүстүлэр. Онон сиилэстэрэ 590 туонна. Ол оннугар отторун былаанын аһаран кыстыкка киириигэ 2332 туонна оттоохтор. “Кладовая Олекмы” ХЭТ 792 ынах сүөһүнү билиҥҥитэ тутан олорор. Онтон ийэ сүөһүтэ 436, ыччат сүөһүтэ 356 төбө. Бу хаһаайыстыба быйыл сайын син атын хаһаайыстыбаларга курдук курааҥҥа да ылларда, күһүҥҥү өттүгэр уһун ардахтарга да баттатта. Ол да буоллар тэрилтэ үлэһиттэрэ баар күүстэрин барытын туһанан кыстыгы 747 туонна оттоох, 1480 туонна сиилэстээх уонна 420 туонна сенажтаах көрүстүлэр.
«Новай сопхуос» АУо быйыл сиилэс бэлэмнээһинигэр күүскэ үлэлэстэ. Ол түмүгэр былааннамыт соругун аһара толорон 2124 туонна сиилэстээх. Онтон ото 190 туонна. Бу хаһаайыстыба билиҥҥи туругунан 452 сүөһүлээх кыстыкка киирэн эрэр. Ынаҕа 215, ыччат сүөһүтэ 237.
Таатта улууһугар баар “Победа” ХЭТ кыстыкка төһө сүөһүлээх-астаах киирэн эрэрин туһунан ылан көрүөххэ. Бу күннэрдээҕи ааҕыынан хаһаайыстыбаҕа 328 ынах сүөһүлээх. Онтон ийэ сүөһүтэ 163 уонна ыччата 165. Хаһаайыстыба быйыл сүөһү аһылыгын бэлэмнээһиҥҥэ тэрээһиннээхтик киирэн былааннаммыт отун оттоон 1002 туонна оттоох кыстыкка киирэн эрэр. Ону таһынан 280 туонна сенаж бэлэмнээн кыстыгы туоруур аһылыктаах олорор.Агрохолдинг икки хаһаайыстыбатыгар “Бөртө сылгы собуота” ХЭТ-гэр 1044 cылгыны, ол иһигэр 527 биэни уонна “Победа” хаһаайыстыбатыгар уопсайа 580 сылгыны, ол иһигэр 259 биэни тутан олороллор.
Дьэ ити курдук агрохолдинг хаһаайыстыбалара сайыҥҥы-күһүҥҥү үлэлэрин үмүрүтэн, хотоннорун өрөмүөннээн кыстыкка этэҥҥэ киирэн эрэллэр. Билигин ити суруллубут сыыппаралар өссө чуолкайданыахтара, күһүҥҥү идэһэ кэнниттэн төһө ынах сүөһү, сылгы кыстыкка киирбитэ дьэ биллиэ.
Прокопий ХАБАРОВ, «Туймаада» Агрохолдинг 2024-10-16 07:34:18 Всего просмотров: 544 Поделиться: 
Ссылки по ключевым словам:
2025-10-21 06:54:09 - Ил Түмэн бэрэссэдээтэлэ Алексей Еремеев «Талбан» биэриигэ Төрүт Сокуоҥҥа киирэр уларытыылары быһаарда 2025-05-08 01:26:21 - СОТОРУ КЭМИНЭН БААҺЫНАЛАРГА ҮЛЭ КҮӨСТҮҮ ОРГУЙУО 2024-11-30 06:46:18 - Владимир Прокопьев: Саҥа сокуон киириитигэр дойдубут уратыта, дьон-сэргэ интэриэһэ учуоттаныаҕа 2024-10-16 07:34:18 - Кыстыкка киирии кэминэн бара турар 2012-08-31 10:17:33 - Афанасий МАКСИМОВ оскуола программатыгар ИТЭҔЭЛИ үөрэтии киирбитигэр тус санаата 2011-06-20 16:38:56 - Омуктар Саха сирин улуустарыгар кимэн киирэн иһэллэр 2011-02-13 05:14:19 - Павел Астахов кэлэн көс оскуола биирдэ интернеккэ киирэ сырытта |
